Arrasateko Udalak ‘Udaberriko turismo eskaintza’ liburuxka argitaratu du

Arrasateko Udalak udaberriko turismo eskaintza eman du ezagutzera aste honetan. Eskaintza zabalik dago adin guztietako pertsonentzat, eta tartean daude familian egin daitezkeen planak.

Turismo eskaintzan hiru atal nagusi aurkitu daitezke: Arrasate 360º gida birtuala, mendi ibilaldiak eta bestelako eskaintzak, besteak beste, kirolari, kulturari eta jaiei lotutakoak.

Bisita historiko-kulturalak ‘Arrasate 360º’-rekin

Arrasaten egin ohi diren Erdi Aroko hiribilduaren eta Ondare Industrialaren ibilbide gidatuak, aurrerantzean ‘Arrasate 360º’ smart map-arekin egingo dira. Bisita birtual honek, askatasun osoa ematen dio bisitariari Arrasateren bisita gidatua egiteko. “Pasa den urteko udaberrian bisita gidatuak egingo zituen profesionalik gabe geratu ginen Arrasaten, eta sortu zen hutsunea aukera baliatu genuen proiektu hau martxan jarriz” azaldu du Jaime Bengoa Tokiko Ekonomia eta Enplegu zinegotziak.

Digitalizazio aurreratuko teknologiaren bitartez, Arrasateren  hiri- eta industria-ondarearen irudikapen zehatza eskaintzen du, bereizmen handiko 8.000 irudi baino gehiagorekin aberastua. Gainera, herriko irudi zaharrak, bideoak eta dokumentu historikoak baliatzen dira gaur egungo egoerarekin alderatzeko, hiribilduaren bilakaera arkitektonikoa testuinguruan kokatzeko aukera ematen dutenak. Guzti hori, geolokalizazioa baliatzeko aukera eskainiz.

Mendi ibilaldiak

Udaberriko eskaintzan, inguratzen gaituzten mendietara irteerak egitea jasotzen da. Aukera dago irteera guztiak familian egiteko, txikienek ere naturaz goza dezaten.

Apirilaren 20an bisita egingo da Arrasateko auzoetara, Aste Santuko opor egunetan. Ibilbide horretan mendiz lotuko dira Meatzerreka, Udala eta Garagartza auzoak, “Arrasateko bira” ibilbidea jarraituz.

Maiatzaren 4an Udala-Gongetako Meatza-Besaide ibilbidea egingo da. Ibilbide horretan, Gongetako meatzeak bisitatuko dira, antzinako burdin meatzeak. Ondoren Besaidera igo eta han hildako euskal mendizaleen oroimenez eraikitako monumentua bisitatuko da, Araba, Bizkaia eta Gipuzkoako mugek bat egiten duten tokian.

Maiatzaren 18an Kurtzetxikiko Bira ibilbidea egingo da. Ibilbide hau Kurtzetxiki (531 m) tontorrera igotzen da mendiari bira emanez, Bedoña auzotik eta Asuela ingurutik igaroaz. Ibilbideak 11,5km ditu.

Ekainaren 1ean Kortaburu - Etxezarreta bide egingo da. 10,5 km-ko luzeera duen ibilbide hau Arrasate eta Oñati arteko mugan zehar Kortaburu (484 m) tontorrera igotzean datza, hemendik Etxezarreta parkera jaitsiz eta herrigunera itzuliz.

Amaitzeko, ekainaren 15ean, Murugain, Dragoiaren Bidetik mendi bidea egingo da. Ibilbide honetan PR-Gi 206 Murugain, dragoiaren bidetik ibilbidea egingo da. Gerra Zibileko lubakiak eta Burdin Aroko herrixkaren arrastoak ikusiko dira.

Bestelako ekintzak

Bestelako ekintza zabalak jaso dira udaberriko turismo eskaintza honetan. Besteak beste kirol lehiaketa ezberdinak (Arrasate-Udalatx, Musakolako BTT martxa, kuadrillen arteko “Tocata” edo Enduro), auzoetako jaiak, azokak edo eta eskaintza kulturalak, besteak beste, Aitzina Biga, Erraldoi eta kiliki topaketa edo eta musikaldia.

Izen emateak

Bisita historiko-kulturalak eta mendi ibilaldiak doakoak izango dira, eta izena eman beharko da izenemateak.arrasate.eus atarian, BAZen edo 943 252 000 telefonoan.

Deskargatu hemen Udaberriko Turismo Eskaintzaren liburuxka.