Arrasatek Mozambike iparraldeko garapen sozioekonomikorako lankidetza hitzarmena sinatu du

Arrasateko alkateak, Maria Ubarretxenak,  Mozambike iparraldeko garapen sozioekonomikoraren programara atxikitzeko sinatutako hitzarmena aurkeztu du Mundukide Fundazioko eta Harreman GKEko ordezkarieekin batera.

Aipatutako programa horren helburu nagusia da Mozambikeko herritarrek errenta sortzeko duten gaitasuna handitzea eta berdintasunean eta jasangarritasunean oinarritutako garapen ekonomikoa sustatuz, bertako bizilagunen autonomia lortzea. 

Horretarako, Arrasateko Udalak berriki sinatutako hitzarmen horrek helburu bikoitza du: aipatutako programa diruz laguntzea batetik eta Harreman eta Mundukiderekin batera, arrasatearrak munduan gertatzen ari diren bidegabekeriez eta egun dauden ezberdintasunez kontzientziatzea, bestetik. “Ezinbestekoa da herritarrek egun munduan dauden desberdintasunak ezagutzea eta horiekin bukatzeko neurriak hartzea, elkarrekin guztiontzat onuragarria eta hobea izango den etorkizuna eraiki dezagun”, azaldu du Arrasateko alkateak, Maria Ubarretxenak.

Horiek horrela, Arrasateko Udalak 15.000€ko ekarpena egingo dio urtero aipatutako programari, 2000. Urtetik  Harreman eta Mundukidek Mozambikeko iparraldean egiten duten lanari jarraipena eman eta laguntzeko xedez. Era berean, hitzarmen horren bitartez, Udalak herrialde horren garapenerako lankidetzara bideratzen duen aurrekontua handitzeko konpromisoa hartu du, legealdi amaierarako, kontu saila udal aurrekontu garbiaren %0.7koa izan dadin. “Udaletik lankidetzaren aldeko apustua egiten dugu eta Mundukide eta Harremanek garatu duten programan eta honen emaitzetan sinesten dugu. Horregatik, bi elkarte horiek egiten duten lana indartu eta bultzatzeko, gure baliabideak areagotu nahi ditugu, modu horretara, bertako pertsonek beren egoera hobetzeko gaitasuna lantzeko aukera ere izan dezaten”, gehitu du Ubarretxenak.

Era berean, hitzarmenak, egindako lanari jarraipena eman eta hau ezagutarazteko, iraupen laburreko bideo bat sortu eta Dibulgazio egunean Kulturaten erakustea jasotzen du.

Etorkizun hobe baten bila

Dagoeneko 15 urte daramatza Mundukidek, Harremanekin batera, iparraldeko Mozambike inguruan lanean eta bertako garapen sozioekonomikorako landutako programak, dagoeneko 55.000 onuradun baino gehiago izan ditu. Horietatik %53 emakumezkoak izan dira. Aipatutako programa horri esker, iaz, nekazaritzari esker lortutako ekoizpenak 4.000.000€ baino gehiagoko diru sarrera izan du. Hau da, programan inbertitutako euro bakoitzak 5€ko irabazia ekarri die bertako baserritar langileei. 

Programa horrek azpiegiturak indartu eta familia nekazaritza sustatu ditu bere hastapenetik. Horretarako hainbat hobekuntza egin dira, hala nola, urte osoan ur jarioa bermatzeko ureztatze sistema berriak eraiki edota beharrezko tresneria edota nekazaritza laguntza teknikoa eskaintzea, modu honetara, urtean zehar nekazal jarduera mantendu eta bermatzeko.

Hitzarmena Udalaren gardentsun atarian kontsultatu daiteke.