Abiatu da ikasturte berria Arrasateko ludoteketan eta gaztetxokoetan

2024/09/06
Card image cap
Okendo, Santa Marina eta Usaetxeko ludotekek irailaren 9an irekiko dituzte ateak, astelehenetik egubakoitzera, 17:00etatik 20:00etara. Ate irekiak egongo dira irail osoan, 3 ludotekak zabalik egongo dira zerbitzuak bertatik bertara ezagutzeko. Irailaren 10ean zabalduko dira auzoetako gaztetxokoak, martitzenetik egubakoitzera, eta irailaren 13an, egubakoitza, Gaztelekua (Nafarroa etorbidean).

Iritsi da iraila eta harekin batera Arrasateko ludotekek eta gaztetxokoek ere ohiko jardunari helduko diote.

Zerbitzu biak aisialdi hezitzailean oinarritzen dira, herriko haurren eta nerabeen interesak, beharrak eta egoera emozionala erdigunean jarrita.

LUDOTEKAK: irailaren 9tik aurrera ate irekiak

3-11 urte bitarteko haur guztiei zuzendutako zerbitzuak dira. Jolaserako eta gozamenerako guneak, ondo pasatzeko, pertsonen artean harremanak sortzeko, auzoan eta herrian parte hartzeko, sormena eta emozioak azaltzeko… betiere, berdintasuna, euskara eta inklusioa oinarri hartuta.

Okendo, Santa Marina eta Usaetxeko ludotekek irailaren 9an zabalduko dituzte ateak, astelehenetik egubakoitzera, 17:00etatik 20:00etara.

Irail osoan ate irekiak egongo dira. Egun horietan, 3 ludotekak zabalik egongo dira zerbitzuak bertatik bertara ezagutzeko, hezitzaileekin hitz egiteko, zalantzak argitzeko, … Urritik aurrera, aldiz, izena emanda egotea eskatuko da ludotekan parte hartzeko.

Izen emateak: ludoteketan (17:00etatik 20:00etara), Gazte bulegoan edo online izenemateak.arrasate.eus

Izena eman daiteke hiruhileko bakoitzerako edo urte osorako.  Kuota: 30 € urte osoan / 10 € hiruhileko.

GAZTETXOKOAK: irailaren 10etik zabalik

12 eta 17 urte bitarteko nerabeei ere espazio bat eskaini gura zaie ondo pasatzeko eta haien garapenean esanguratsuak diren arloak lantzeko: aisialdia, pertsonen arteko harremanak, parte hartzea, sormena, autonomia, emozioak, …

Auzoetako gaztetxokoak irailaren 10ean zabalduko dira , martitzenetik egubakoitzera, 17:00-20:00.

Musakolaren kasuan, aurtengo ikasturtean lokal berria egokitzeko obrak egingo dira. Obra horiek amaitu bitartean, auzoko nerabeek aukera izango dute alkatetza ondoko lokalean biltzeko.

GAZTELEKUA

Nerabeei zuzendutako asteburuetako aisialdi eskaintza Gaztelekutik bideratzen da, Nafarroa etorbidean dagoen tren geltoki zaharrean. Irailaren 13an zabalduko da, 18:00etan. Gaztelekua astebururo zabalduko da, ordutegi honekin: egubakoitzean 18:00-21:00 / zapatuan eta domekan 17:00-21:00.

Informazio zabalagorako, Gazte bulegora jo, 943 25 20 65 telefonora deituz edo gaztebulegoa@arrasate.eus helbidera idatziz.