2025eko tasa eta zergak ordaintzeko egutegi eta hobarien berri emango du Udalak etxez etxe banatuko duen eskuorriarekin

Zergen inguruko esku orri informatiboa banatuko du Udalak etxez etxe datozen egunotan. Dokumentuan jasotzen da 2025eko zergen gaineko informazio osatua: alde batetik Arrasateko egutegi fiskala eta, bestetik, tasak eta zergak ordaintzeko hobarien inguruko informazioa. Ikusi eskuorria hemen.

Hobari ugari daude hainbat udal zerga eta tasatarako. Dokumentu honetan 27 hobari mota jasotzen dira, pasa den urten baino bi gehiago, lau aplikazio-eremu ezberdinetan banatuta: ondasun higiezinen gaineko zergak ordaintzeko hobariak, ibilgailuen zergak ordaintzeko hobariak, obren gaineko zergak ordaintzeko hobariak eta komertzio berriak sustatzeko hobariak.

“Helburua progresibitatea ezartzea da, eta lan horretan ari da Udal Gobernua. Gai konplexua denez, lanketa sakona behar du, eta, bitartean, udalaren eskumenak diren beste tresna batzuk erabiltzeko apustua egiten jarraituko dugu hobariekin, horiek baitira progresibitatera gerturatzeko tresna eraginkorrenak gaur gaurkoz” azaldu du Joseba Ezpeletak Ogasun saileko zinegotziak.

Etxebizitza hutsen alokairua sustatzeko %99ko hobaria

Arrasateko Udalak 2025ean egin dituen berrikuntzen artean aurkitzen da etxebizitza hutsak Bizigune programa bitartez alokairuan eskaintzeko %99ko hobaria. Eusko Jaurlaritzak kudeatzen duen alokairu programa honen bitartez etxebizitza alokatzeko apustua egiten duten herritarrek, Ondasun Higiezinen gaineko Zergaren (OHZ) %99a ordaintzeaz salbuetsita egongo dira. “Etxebizitza hutsak merkaturatzeko eta alokairu publikoa sustatzeko aukera guztiak baliatu nahi ditugu hobari honekin, izan ere, orain arte %50ekoa zen hobaria, eta berriki egin den lege aldaketarekin, aldaketa burutu dugu” adierazi du Ezpeletak. Udal hobariaz gain, Bizigune programaren aldeko apustua egiten dutenek, berme juridiko eta ekonomikoak izango dituzte, abantaila ezberdinez baliatzeko aukerez gain. Bizigune programaren informazio guztia hemen.

Bestelako hobarien artean daude jasangarritasuna sustatzeko hobariak, komertzio berriak sustatzeko zerga-arintzea, errenta txikia dutenei hobaria kiroldegian edota euskara ikasteko hobariak. Informazio guztia eskuragarri izango dute herritarrek BAZen edota arrasate.eus udal webgunean.

Egutegi fiskala

Egutegi fiskalaren berri ere eman du Udalak, ordaindu beharreko zergak noiz eta nola ordaindu behar diren ezagutarazteko. Horrela, Udalak "gardentasuna eta informazio osoa" eskaini nahi die herritarrei zergei eta horiek izan ditzaketen hobariei buruz.

Hauek ordaintzeko, epe jakin bat baino gehiago dago; besteak beste urtekoak, seihilekoak edo hiru hilean behin ordaintzen diren zergak. Arrasateko Udalak horien guztien berri eman du eta epealdien kobratze datak jakinarazi ditu, "plangintza bat errazteko".

Zergak, udal zerbitzu publikoen bermea

Ogasun zinegotziak azaldu duenez “udalak eskaintzen dituen zerbitzu publikoak komunitarioak dira, eta guztion ekarpenari esker funtzionatzen dute. Kiroldegia, kirol elkarteei diru laguntzak, liburutegia, kultur eskaintza, gizarte zerbitzuetako laguntzak, gazteria politikak eta gurasoen formakuntzak, ludoteka eta gaztetxokoak, haur parkeak, berrurbanizazio proiektuak, argiteria, segurtasuna, ondare historikoa… Herriak funtziona dezan guztion ekarpena behar du, erakunde publikoena, enpresa pribatuena eta herritarrena. Kontrako kasuan, Arrasateko Udala paralisian eta kaudimen faltan aurkituko litzateke”.