“Emakumeak protagonista” elkarrizketa saioa antolatu du Emakume Txokoak Belen Nevado Méndezekin

Emakume Txokoak martxan duen egitarauaren baitan, emakume sortzaileen lanari eta ekarpenari tartea eskaini dio, hainbat emanalditan.

Apirilaren 9an, “Emakumeak protagonista” elkarrizketa zikloaren saio bat antolatu du, Belen Nevado Mendez antzerkilaria  gertutik ezagutzeko eta bere ibilbideari aitortza egiteko asmoarekin.

Oholtza eta “saltsa” askotan ibilitakoa da Belen Nevado, artista gasteiztarra. Arrasaten  ere, hainbat ikuskizun taularatu ditu: “Las punkis también lloran” , “Jhony &Jane”,  “Ovarios verdes fritos”, “Sofocos”, besteak beste.

Bere ibilbidean antzerki-konpainia ezberdinetan egin du lan eta musika munduan ere aritu da, La Xeta Paxote eta Carrocerías Betoño taldeetan, nagusiki.

Beste esparru batean, formatzaile lanak ere egin ditu Emakume Txokoko Jabetze Eskolan eskaini dituen hainbat tailerretan: kabareta, inprobisazioa, testuen interpretazioa, zapalduaren antzerkia, klown... Espazio horiekin eta lan kolektibo eta eraldatzailearekin duen inplikazioa eta konpromisoa da bere nortasun-ezaugarrietako bat.

Sormena, pasioa, umorea,  ikuspegi feminista,  transgresioa… dira, baita ere,  bere lanaren ezaugarrietako batzuk, bai antzerki munduan, bai musika arloan, zein Jabetze eskoletan ere. Helburu argi batek zeharkatzen baitu bere biografia osoa: antzerkia, artea, sormena  emakumeen ahalduntzerako prozesuak sustatzeko  eta eraldaketarako tresna bezala lantzea.

Bere lanera eta ibilbidera gerturatzeko, Beatriz Egizabal Ollokiegiren laguntza izango dugu.

Egizabal,  bera ere, oso ezaguna da Clown, ipuin kontalari, bakarrizketa egile eta inprobisatzaile bezala. Bere lanak periferiatik eta feminismoa erdigunean jarriz sortzen dituela dio; eta hortik badute biak ala biak.

Umorea eta konplizitatea, tarteko, saio polita eskainiko dute elkarrekin eta izango da barre egiteko, emozionatzeko, hausnarketa feministarako eta bi artista haundi horietaz gozatzeko aukera. Zuen zain izango gara!