Arrasatek autobus elektriko bat probatuko du hiri zerbitzuko ibilgailuen flota berritzeko

Arrasateko Udalak Zalduspeko autobus geltokian aurkeztu berri du aitpbis eñeltrolp bat. herrian hainbat astez probetan ibiliko dena. Udala aztertzen ari da udalerriko etorkizuneko autobus berriak elektrikoak izatea, izan ere, urteko bigarren seihilekoan ibilgailu berrien erosketa lehiaketara ateratzea aurreikusten du, herritarrei ahalik eta zerbitzurik onena eskaintzeko. Prentsaurrekoan parte hartu dute Maria Ubarretxena alkateak, Victoriano Fuentes Obra eta Zerbitzuetako zinegotziak eta Avanza SA udal autobus zerbitzuaren enpresa emakidadunaren ordezkariek.

Victoriano Fuentesek adierazi duen bezala, “gaur egun indarrean dagoen kontratuaren agiria prestatzen autobusentzako hainbat aukera aztertzen ari gara. Udala irekita zegoen flota berritzeko aurreko lehiaketan, baina Avanza SAk aukera hori bermatzen bazuen, egungoari eusteko aukera ere aurreikusten zuen. Avanza enpresarekin gaia aztertu eta gero, adierazi zuten autobusek zerbitzu kontratu bat gehiago eman zezaketela, hobekuntza batzuk eginez. Hobekuntza horien esparruan motorrak aldatu ziren gasoilez eta gasez funtzionatu zezaten, eraginkorragoak eta ingurumenarekin garbiagoak izan zitezen. Hala ere, egungo autobusen matxurak direla-eta dauden arazo guztiak ikusita, beharrezkoa da berritzea”.

Hasieran, kontratuak hiru lerro zituen. L1 eta L2 tradizionalak dira, autobus zerbitzua jarri zenetik funtzionatzen dutenak. Linea bakoitzean bi autobus daude, noranzko zirkularrean eta kontrako noranzkoan doazenak (25' inguruko kadentzia). Gainera, linea horiek erreserbako autobus bat dute. Guztira 5 autobus.

Kontratu honetan L3 linea sartzen da, aldi baterako, TAO zerbitzua sartzen laguntzeko. Linea hori herriaren behealdetik doa, Eroski eta Uribarri arteko linea azkar gisa. Urtebete igarota, erabaki da zerbitzua 7:45era murriztea, jendea lehen zerbitzuan bakarrik ibiltzen baitzen.

Victoriano Fuentesek adierazi duenez, “kontrata berriaren probaldia igarota, arazoak antzeman genituen: Avanza enpresak ez zituen ordezkatzen matxuratutako autobusak, zerbitzutik kanpo daudenak birjartzeko ezarritako denbora… eta enpresa zigortzen hasi ginen”.

Guztira 5 espediente ireki dira, eta guztira 1.700 euroko 7 isun eta zerbitzurik ez emateagatiko deskontuak jarri dira.

“Hainbat bilera egin dira Avanzarekin – adierazi du Fuentesek –, egoera hobetzen saiatzeko. Arazo batzuk minimizatu badira ere, ez dira erabat konpondu. Testuinguru horretan eta ikusita neurri gehiago hartu behar direla zerbitzua bermatzeko, udalak erabaki du autobus flota berritzea ibilgailu berriak erosita”.

“Udal zerbitzuen etengabeko hobekuntzaren esparruan eta energiari dagokionez, eraginkorragoak izateko, udalak abian jarritako lan ildo estrategikoan sakontzearen esparruan, autobus elektriko batez probak egingo dira hainbat astez udalerrian. Zerbitzua erabiltzaile barik ibiliko da, eta helburua da Arrasate bezalako udalerri batean zelan funtzionatzen duen ikustea da, goiko auzoen ondorioz duen desnibela kontuan hartuta. Ibilgailu berriak erosteko agiri berrirako probak dira, eta urteko bigarren seihilekoan lehiaketara atera nahi dugu”.

Maria Ubarretxena alkateak adierazi duenez, “badakigu Avanza SAk eskaintzen duen zerbitzua ez dela udalak ezarritakoa eta hobetu egin behar dela. Jakinaren gainean gaude, kezkatuta eta lanpetuta gaude gaiarekin, eta konponbideak aktibatzen ari gara. Arrasatek autobus berriak izango ditu laster. Orain autobus elektrikoarekin probak egingo ditugu. Arrasatek auzo altuak ditu, eta autobus mota horren ezarpena zailtzen dute, dituen ezaugarriengatik. Baina mugikortasun berdeago eta iraunkorrago baten aldeko apustua funtsezkoa eta lehentasunezkoa da. Ikusiko dugu zelan funtzionatzen duen, eta erabakiko dugu ibilgailu berrien ezaugarririk onenak zeintzuk izan behar duten, betiere arrasatearrei ahalik eta zerbitzurik onena eskaintzeko”.