Udalak 3. autobus linea azkarraren ibilbidea egokitu du eta Zalduspe-Ospitalea geltoki bateratua sortu, garraio publikoaren erabilera sustatzeko

Arrasateko Udalak herriko autobus zerbitzuan egokitzapenak egin ditu ikasturte berriari begira, zerbitzuaren efizientzian sakondu eta herritarrari zerbitzu egokiagoa eskaintzeko, garraio publikoaren erabilera sustatzearekin bat. Neurriok indarrean sartuko dira irailaren 13tik aurrera, astelehena.

Hala, 3. linea azkarraren ibilbidean aldaketa bat ezarri da: ELMAko geltokia desagertzen da eta autobusak Zigorrolako industriagunetik egingo du ibilbidea Zalduspeko geltokira iristeko.

Horrez gain, Zalduspeko eta ospitaleko geltokiak bateratu dira; horrela, autobus linea guztiek geltokia izango dute Zalduspe-Ospitalea geltokian, Zalduspeko autobus geltokian.

Bestalde, udalak argitu du autobus guztiek IAT behar bezala dutela, eta une honetan egokitzen ari direla gasez funtzionatzeko, ekologikoagoak izateko, Arrasate herri jasangarriagoa egiteko apustuan. Hori dela eta, egokitzapen hori egiten ari diren bitartean, Oñatiko Udalak autobus bat utzi dio Arrasateko udalerriari, eskualdeko udalen arteko lankidetza eta harreman onaren esparruan.